തിരുവനന്തപുരം : കൃഷി ചെയ്യുന്ന വിദ്യാർഥികൾക്ക് ഗ്രേസ് മാർക്ക് നൽകുന്ന പദ്ധതി നടപ്പാക്കാൻ സംസ്ഥാന സർക്കാർ. രാജ്യത്ത് ആദ്യമായി ഇത്തരമൊരു പദ്ധതി നടപ്പാക്കുന്ന സംസ്ഥാനമായി കേരളം മാറുമെന്ന് കൃഷിവകുപ്പ് മന്ത്രി ടി. സിദ്ദിഖ് പറഞ്ഞു.
പഠനത്തോടൊപ്പം വിദ്യാർഥികളെ കൃഷിയിലേക്ക് ആകർഷിക്കുകയും പരിസ്ഥിതി അവബോധം വളർത്തുകയുമാണ് പദ്ധതിയുടെ പ്രധാന ലക്ഷ്യം. തിരുവനന്തപുരത്തെ കുളത്തൂരിൽ കൊയ്ത്തുത്സവം ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി.
വിദ്യാലയങ്ങൾ കേന്ദ്രീകരിച്ചുള്ള കാർഷിക പദ്ധതികൾ സംസ്ഥാനത്ത് മികച്ച രീതിയിൽ നടപ്പാക്കുന്നുണ്ടെന്നും മന്ത്രി പറഞ്ഞു. ഈ വർഷം പുതുതായി 500 സ്കൂളുകളിൽ കതിർ കാർഷിക ക്ലബുകളുടെ പ്രവർത്തനം ആരംഭിച്ചിട്ടുണ്ട്. അടുത്ത അധ്യയന വർഷത്തോടെ സംസ്ഥാനത്തെ എല്ലാ സ്കൂളുകളിലും കതിർ ക്ലബുകളുടെ പ്രവർത്തനം വ്യാപിപ്പിക്കാനുള്ള ശ്രമങ്ങൾ ഊർജിതമാണെന്നും മന്ത്രി വ്യക്തമാക്കി.
സ്കൂളുകൾക്ക് പുറമെ വിദ്യാർഥികളുടെ വീടുകളിലും കൃഷി ആരംഭിക്കുന്നതിനാണ് പദ്ധതിയിലൂടെ ലക്ഷ്യമിടുന്നത്. ഇതിനായി ഓരോ സ്കൂളിനും 10,000 രൂപ വീതം നൽകും. ഇതിന്റെ ഭാഗമായി കതിർ സഞ്ചാരവും കതിർ മാർക്കറ്റും ആരംഭിക്കും. പദ്ധതിയെ ഉച്ചഭക്ഷണ പദ്ധതിയുമായി ബന്ധിപ്പിക്കുമെന്നും മന്ത്രി പറഞ്ഞു.
വിദ്യാർഥികളെ കാർഷിക മേഖലയിലേക്കും പരിസ്ഥിതി സംരക്ഷണ പ്രവർത്തനങ്ങളിലേക്കും കൂടുതൽ അടുപ്പിക്കുന്നതിനായി സംസ്ഥാന സർക്കാർ ജൂൺ 5നാണ് കതിർ പദ്ധതിക്ക് തുടക്കമിട്ടത്. കേരള അഗ്രികൾച്ചർ ടെക്നോളജി ഹെറിറ്റേജ് ആൻഡ് ഇന്നൊവേഷൻ ഫോർ റൂറൽ അണ്ടർസ്റ്റാൻഡിങ് എന്നതിന്റെ ചുരുക്കപ്പേരാണ് കതിർ. കാലാവസ്ഥാ വ്യതിയാനം ഉയർത്തുന്ന വെല്ലുവിളികളെ നേരിടുന്നതിനുള്ള കാർഷിക ഹരിത പ്രതിരോധത്തിന്റെ ഭാഗമായാണ് പദ്ധതി വിഭാവനം ചെയ്തിരിക്കുന്നത്.
0 Comments